Harmony Clean Flat Responsive WordPress Blog Theme

. . . . :(

2/02/2012 07:52:00 م Dondon Lambert 40 Category :

{{{ بِسْمِ اللَّهِ الرَّحْمَنِ الرَّحِيمِ (1) الْحَمْدُ لِلَّهِ رَبِّ الْعَالَمِينَ (2) الرَّحْمَنِ الرَّحِيمِ (3) مَالِكِ يَوْمِ الدِّينِ (4) إِيَّاكَ نَعْبُدُ وَإِيَّاكَ نَسْتَعِينُ (5) اهْدِنَا الصِّرَاطَ الْمُسْتَقِيمَ (6) صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ (7) }}}
يا جماعه اقرو الفاتحه على الشهداء بتوع امبارح :( 

السلام عليكم و رحمة الله و بركاته 

ازيكم يا بنات ؟ 
انشاء الله تمام 
اكيد طبعا يا بنات شوفتوا اللى حصل امبارح !! 

و انا بقى عايزة اسئل سؤال قبل ما ابداء و اقول اى حاجه هل دا يرضى ربنا ؟؟ 

يا جماعه انهى دين فى الدنيا ينصح باللى حصل امبارح دا ؟؟ 

طيب الاسلام نهى عن القتل 
و المسيحيه نهت عن القتل 
حتى اليهوديه يارب نهت عن القتل 
دول بقى اللى ارتكبوا جرايم امبارح دول ايه ملتهم ايه دينهم ؟؟ 
 عايزا ونبى حد يجاوبنى لانى هنفجر بجد 
و تانى هسئل نفس السؤال هل دا يرضى ربنا ؟؟ 
هل عادى اليومين دول ان الواحد يقتل و كمان يتباها انه قتل ؟؟ 
هل عادى ان واحد يقتل و يتفاخر على الفيس بوك و تويتر انه قتل ؟؟؟؟ 
هل عادى ان واحد يقتل و يرجع على بيته اواام يروح فاتح النت و ينزل على طول على الفيس بوك انا قتلت 5 يا رجاله قتلت الخونا قتلت . . . قتلت ؟؟ 
هل عادى ان واحد ييتم عيال بانه يقتل ابوهم او واحد يقهر ام على ابنها او يقهر اب على ابنه او يقهر اخ او اخت على اخوهم ؟؟ 
عادى ها عادى ؟ 
هل عادى ان اربعه يمسكو واحد و يروحو رمينو من فوق مدرج بتاع استاد كورة قدم ؟؟؟
عادى ؟؟ ايه يا بنات عادى ؟؟ ركزو كده فى كل الاسئله دى و جابو عليها مع نفسكو كده 
شباب كتير اوى راحو و عشان ايه ؟ عشان ايه و بسبب ايه ؟؟ فكرو كده بسب بايه  ؟ 
بسبب رياضه ايوة بسبب رياضه 
ايه ايه ؟؟ ليه دا بيحصل فى بلدنا ؟ ناس بتشوف اصحابها بتموت ادامها و مش عارفه تعمل حاجه و ناس تنطق الشهاده ادام حد و هو مش قادر يسيطر على نفسه و بردو مش قادر يعمل حاجه 
بجد بكتبلكوا الكلام دا و انا بعيط و مش قادرة اسيطر على نفسى مش قادرة . . . 
حاسه ان بلدى بتقع ادامى و بتضيع و انا مش قادرة اعمل حاجه غير انى اعيط . . . 
و بسئل نفسى سؤال واحد هو ليه بيحصل كده فى بلدى و مش لقيه اجابه حتى بس انى اصبر بييها نفسى . . . :(
مش لقيه . . . و مش عارفه ليه بيحصل كده و هتجنن 
و قلبى بيوجعنى اووى لما بشوف صورة شهيد ميت ولا حد مصاب و بموت فى الثانيه الف مرة لما بسمع صوت ام مقهورة على ابنها
و اللى حصل امبارح دا شيئ غريب و بجد يخلى الواحد يخرج عن شعوره كل واحدا تسئل نفسها كده مين اللى كان بيتخانق مع مين 
سيبكوا من اهلاويه و بور سعيديه لا لا مصريين ولا لا ؟؟ ها مصريين ولا لا ؟ 
و ايه سبب اللى حصل امبارح دا؟؟ ها ايه السبب ؟ 
انا بعترف ان الاهلاويه غلطو الاول انهم قالو للبورسعديه انتو مش رجاله دا خطأ قاتل فعلا ( دا لو كانو قالو فعلا كده )
بس . . . . مش دا المفروض يبقا الرد على كده . . .مش القتل الحل المناسب مش القتل يا ناس مش القتل بجد تعبت ليه دا بيحصل فى بلدنا ؟؟ ليييييييييييييييييييييييييه ؟ 
عارفه ان كلامى ممكن ميكنش مفهوم او مش مرتب او غريب شويه !  بس هتجنن ليه دا يحصل ؟؟ 
و بسبب رياضه او ماتش ليه ؟ و كمان ان اللى عملوا كده كانو منتصريين يعنى مش مهزومين كان ده هيسهل علينا شويه و كان ممكن دا يكون اجابة على سؤألنا لاكن لا منتصريين 
مين شاف منظر الاعيبه و هى بتجرى من الجماهير الهايجه و الطايشه مين شاف ؟؟ مين ؟؟ مين سمع ابو تريكه و هو بيقول فى واحد نطق الشهاده ادامى و انا عاجز انى اعمله حاجه ؟؟ مين شاف اكرامى و هو بيحاول يهرب من بلطجيه ملهمش لزمه عايزين يموتوه ؟؟ مين سمع الاعيبه كلهم بيزعقوا و بيتألمو و بيقولوا الناس بتموووت ادامنا يا جماعه و احنا مش قادريين نعمل حاجه ايدينا مليانه دم و حتى مش عارفين نخرج نشطفها ؟؟ 
و تانى هرجع اسئل نفس السؤال هل دا يرضى ربنا ؟؟ 
بجد مش عارفه اقول ايه بس فى نفس الوقت فى كلام كتير جوايه مش قادرة اقولو 
لانه غريب نوعا ما :( :( 
و فى الاخر هقول جملتين . . . . جملتين بس 
الاولى : حسبى الله و نعم الوكيل 
و التانيه : ان لله و ان اليه راجعون . . .  :( 

و ياريت تقروا الفاتحه على الشباب اللى زى الورد اللى راحو من غير اى سبب دول يا بنات 

{{{ بِسْمِ اللَّهِ الرَّحْمَنِ الرَّحِيمِ (1) الْحَمْدُ لِلَّهِ رَبِّ الْعَالَمِينَ (2) الرَّحْمَنِ الرَّحِيمِ (3) مَالِكِ يَوْمِ الدِّينِ (4) إِيَّاكَ نَعْبُدُ وَإِيَّاكَ نَسْتَعِينُ (5) اهْدِنَا الصِّرَاطَ الْمُسْتَقِيمَ (6) صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلَا الضَّالِّينَ (7) }}}


و انا اسفه اوووى لطنط نانى لو كان الموضوع غريب شويه او فى كلمات غريبه او ملهاش لزمه بس انا حاولت اطلع اللى جوايا اسفه مييت مرة :( 

40 التعليقات